एक्सपोजर व्हीजीट- आऊट ऑफ स्टेट

 एक्सपोजर  व्हीजीट - आऊट ऑफ स्टेट ( सहल )

एक  अविस्मरणीय ,रोमहर्षक अनुभव

मी अफसाना अकबर नदाफ इ. 8 वी जिल्हा परिषद प्राथमिक मराठी शाळा, काराजनगी, ता.- जत, जि.- सांगली.या शाळेतील विद्यार्थिनी. शासनाच्या वतीने सांगली जिल्ह्यातील इयत्ता  6 वी ते  8वी च्या परराज्य सहलीमध्ये जिल्ह्यातील चाळीस विद्यार्थ्यांची निवड झाली  होती.  आमच्या जिल्हा परिषद मॉडेल स्कुल काराजनगी, ता- जत, जि-सांगली. या   शाळेमधील पाच विद्यार्थ्यांची निवड झाली.  त्यामध्ये मी स्वतः अफसाना अकबर नदाफ ,ऋतुजा गेनू गायकवाड  व शिवराज नागेश नरुटे तिघेही 8वी ,  सोहम गोरखनाथ माने  7 वी आणि प्रवीण बंडू पवार 6वी.  मी जेव्हा माझे नाव सहलीमध्ये ऐकले ना !  तेव्हा मला खूप आनंद झाला. ही सहल सांगली जिल्ह्यातील जिल्हा परिषद शाळांतील केवळ हुशार ,होतकरू, प्रामाणिक  आणि उच्च शिक्षण घेऊ पाहणाऱ्या विद्यार्थ्यांसाठी शासनाने आयोजन केलेल्या सहलीपैकी एक विझिट अर्थात सहल होती. जेव्हा मी हे आमच्या महानोर सरांकडून ऐकले तेव्हा मला माझ्या  प्रामाणिकपणाचा अभिमान तर वाटलाच; शिवाय आईवडिलांचा  आणि शिक्षकांचा विश्वास संपादन करून  अभ्यास केला त्याचे हे फळ आहे, असे देखील जाणवले. प्रशासनाने आम्हाला म्हणजे आमच्या पालकांना फोन करून सहलीविषयी कल्पना दिली. त्यानंतर श्वेता पाटील मॅडम व पवार सर आणि पवार  सरांच्या  मॅडम तसेच माळी सर आणि माळी मॅडम यांनी एक ग्रुप तयार केला आणि ग्रुपचे नाव ठेवले एक्सपोजर व्हीजिट (Exposure Visit). त्यानंतर भेटीचे ठिकाण ठरवले ते म्हणजे हैदराबाद; तेलंगणा राज्य.  सहलीची  तारीख 17 मार्च 2025 अशी ठरली.  त्या दिवशी सहलीला निघायचे होते. एक आठवडाभर अगोदर आम्हाला एक्सपोजर व्हीजिट या ग्रुपवर माहिती देण्यात सुरुवात केली. सहलीमध्ये सोबत काय काय साहित्य घ्यायचे व काय आवश्यक वस्तू घ्यायच्या इत्यादी बद्दल सविस्तर माहिती  सांगितली. सहलीमध्ये आपण कोण कोणती स्थळे पाहणार आहोत,  त्याबद्दल ही काही माहिती महानोर सरांनी सांगितली होती आणि  ग्रुपवर  देखील झूम मिटिंग घेऊन समजावून सांगितली. त्यामुळे आमची सहलीला जाण्याची उत्सुकता आणखीनच वाढली. सहलीचा कालावधी पाच दिवसांचा होता,  सोमवार दि. 17 मार्च, 2025 ते  शुक्रवार दि. 21 मार्च, 2025. 17 मार्चला सोमवारी जिल्हा परिषद जवळ सायंकाळी 7:30 ला हजर राहण्यास सांगितले होते.  शनिवारी आमच्या  शाळेचे मुख्याध्यापक  साळे सर, सोनार सर,पाटील सर, महानोर सर यांनी,  आम्हाला येथून कसे जायचे ?  ते समजावून सांगितले. आम्ही शनिवार व रविवारी आमच्या सहलीला जाण्यासाठी फुल्ल तयारी केली. सोमवारी सायंकाळी 4:45 वाजता काराजनगी मधून निघालो.  सांगलीमध्ये सायंकाळी 6:55 ला पोहोचलो. जिल्हा परिषद कार्यालयाच्या  पाठीमागे श्री दत्त मंदिर आहे तेथेआरती सुरू होती.  आम्ही त्या आरतीमध्ये सामील झालो. आरती संपली. देवाच्या पाया पडलो. प्रसाद घेतला. मनाला छान वाटले. तोपर्यंत सीईओ तृप्ती धोडमिसे मॅडम आल्या. आम्ही त्यांच्यासोबत फोटो काढले. मॅडमने आम्हाला एक्सपोजर व्हीजीटला जाणाऱ्या टीमला शुभेच्छा दिल्या. त्यानंतर श्वेता पाटील मॅडमनी सगळ्या मुलांना एकत्र करून सूचना सांगितल्या.  बस आली.  आम्हाला जेवण करण्यास सांगितले.  आम्ही जेवण केले.  नंतर सर्व तालुक्यातील विद्यार्थ्यांना वेगवेगळ्या रांगेत उभे केले.  आधार कार्डच्या झेरॉक्स घेतल्या. आम्ही बसमध्ये चढलो. त्यानंतर सर्व मुलांनी आपापल्या पालकांना,  शिक्षकांना टाटा बाय-बाय केले.  सर्व शिक्षक आले.  फोटो काढले. आणि उत्सुकता असलेल्या व्हीझिटसाठी आमची  बस हैदराबादच्या दिशेने  निघाली.

आम्ही रात्री साडेआठ ते पावणे नऊच्या दरम्याने हैदराबाद च्या दिशेने सहलीला निघालो. बस सांगली मधून निघाली. अंधार असल्यामुळे आम्ही  लगेच झोपी गेलो. पहाटे पाच वाजता आम्ही तेलंगणा राज्यांमध्ये प्रवेश केला आणि 7:20 ला हैदराबाद शहरांमध्ये दाखल झालो.  आम्हाला राहण्याच्या ठिकाणी युथ होस्टेलला जायला सव्वा आठ वाजल्या. आम्ही हॉस्टेलवर जाऊन  फ्रेश झालो. काहीजण आवरून घरच्यांना आणि शिक्षकांना हैदराबादमध्ये पोहोचलो म्हणून फोन लावत होते. तर काही जणांनी तसा व्हाट्सअप वर मेसेज पाठवला.  त्यानंतर थोडी रेस्ट घेतली. काहीजणांनी फोन चार्ज केला आणि सर्वजण आवरून खाली आलो. त्यानंतर सर्वजण त्या हॉस्टेल समोर उभे राहून एक आठवण म्हणून फोटो काढला. नाश्ता करण्यास गेलो.  नाश्त्यामध्ये इडली सांबर होते ते तेलंगणाचे आवडते खाद्य. खूप स्वादिष्ट वाटले. नाश्ता करून आम्ही बसमध्ये विझिट  साठी निघालो. आमच्या सहलीचे पहिले ठिकाण होते गोवळकोंडा किल्ला. 

(1) गोवळकोंडा किल्ला:-

गोवळकोंडा किल्ल्याला हैदराबादमध्ये सर्वजण गोलकोंडा किल्ला म्हणतात.  गोवळकोंडा किल्ला हा कुतुबशहाने संपूर्ण हैदराबाद शहरावर नजर ठेवण्यासाठी बांधलेला किल्ला म्हणजे गोवळकोंडा. गोवळकोंडा वरून संपूर्ण हैदराबाद शहराचे दर्शन होते; ते आम्ही तेथे प्रत्यक्ष पाहिले. तेथून संपूर्ण हैदराबाद  शहर  दिसत होते.  त्या उंचच्या उंच बिल्डिंग वाहनांची रहदारी  पाहायला खूप मज्जा येत होती. आम्ही खेड्यातील मुलं. तसा इतक्या मोठ्या शहरात मी आणि बरीचशी मुलं पहिल्यांदाच आलेली. शहर वरून सिनेमात पाहणे आणि प्रत्यक्ष पाहणे यात खूप मोठा फरक आहे.हे मला समजलं.  गोवळकोंडा वरून काही पाहण्याची ठिकाणे होती.  ती ही सरांनी आम्हाला लांबून दाखवली. दूरवर  एक - दोन मंदिर दिसत होते. त्या पार्श्वभूमीवर फोटो काढले आणि मग आम्ही किल्ला उतरायला सुरुवात केली. तेथील काही सुस्थितीत तर काही पडझड झालेल्या काही भिंती पाहिल्या. किल्ल्यामध्ये असणाऱ्या सर्व दालनं पहिली.महाल, सदर, बुरुज, भवानीमाता मंदिर, बगीचा, प्रवेशद्वार इत्यादी खूबसुरत बांधकाम आणि किल्ल्याची मजबूत तटबंदी पाहण्यासारखे आहे. किल्ला पाहून खाली उतरलो. जेवण केले. ज्यांना ज्यूस पाहिजे होता त्यांनी ज्यूस घेतला. त्यानंतर पुढच्या ठिकाणास निघालो आणि आमचे पुढचे ठिकाण होते एनटीआर गार्डन.

(2) एनटीआर गार्डन ( NTR Garden) :- 

 एनटीआर गार्डन हे ठिकाण  खूप सुंदर  आहे. तेथे आम्ही पाण्याचे वेगवेगळे फवारे पाहिले. एक छोटासा झरा पाहिला.  तेथे खूप विविध प्रकारची झाडे, फुलझाडे आणि  रंगीबेरंगी फुले होती. तेही पाहिले. बागेत  फुलांच्या पार्श्वभूमीवर फोटो काढले. तेथे खेळण्यासाठी काही वेगवेगळी खेळणी आणि पाळणे होते. त्यानंतर थोडा वेळ  त्या खेळण्यात बसून तेथील वातावरणाचा आनंद घेतला. जवळच एक बी आर लॅब होती ती काही आम्ही  पाहिली नाही. त्यानंतर आम्ही पुढच्या ठिकाणाला गेलो ते म्हणजे बिर्ला मंदिर.

(3) बिर्ला मंदिर :-

 बिर्ला मंदिर उंचावर आहे. वातावरण खूप सुंदर आणि हवेशीर आहे.  बिर्ला मंदिर पासून देखील हैदराबाद सिटीचे दर्शन होते.  आम्हाला बिर्ला मंदीरवर जायला बरीच रात्र झाली होती. म्हणून  हैदराबाद शहराचा काही भाग दिसत होता;  तर दूरचा भाग दिसत नव्हता.  परंतु घरांचे व गाड्यांची लाईट यावरून त्या शहराचा अंदाज येत होता. गाड्यांच्या चालत्या वाहनांचा प्रकाश आणि घरांच्या समोरून पडणारा विविध कलरचा प्रकाश;  हे दृश्य अतिशय नयनरम्य वाटत होते. ते सीन खूपच मस्त वाटत होते. वाटत होतं आपलं गाव असं का नाही? तेच ते दृश्य पाहतच राहावं असं वाटायचं. बिर्ला मंदिर परिसरात वेगवेगळ्या देवांच्या मुर्त्या पाहिल्या. तेथील जुन्या काळातील कोरीव काम पाहिले आणि थोडा वेळ थांबलो बसलो. त्यानंतर मग आम्ही बिर्ला मंदिर मधून बाहेर पडलो.तेथेही काही आठवण म्हणून फोटो काढले. त्यानंतर जवळच असलेले बिर्ला सायन्स लॅब  पाहायला गेलो. 

(4) बिर्ला सायन्स म्युझियम :- 

 पुढचे ठिकाण आमचे बिर्ला सायन्स म्युझियम. बिर्ला सायन्स म्युझियम पाहण्यासाठी खूप सुंदर आणि छानच आहे.  तेथे सेम एक म्हणजे जसे की पिक्चर साठी असतो तसेच तिथे एक अर्धवर्तुळाकार पडदा होता. तेथे त्या शीटवर जाऊन बसलो.  दार बंद झाले.  त्यानंतर अचानक  शो सुरु झाला.  तेथे अगोदर हैदराबाद शहर दाखवले. तेथील प्रदूषणामुळे  अवकाशावर अर्थात आकाशातील ताऱ्यांच्या दिसण्यावर झालेला म्हणजेच रात्रीवर  झालेला परिणाम दाखवला. आपल्याकडे जसे सायंकाळी सात ते साडे सातच्या दरम्यान जसा अंधार असतो तेवढा तेथे संपूर्ण रात्रभर अंधार असतो ,असे भासले.  तेथे तारे खूप कमी नजरेस  पडतात.  आमच्याकडे खेड्यात स्वच्छ वातावरणात खूप तारे दिसतात.  परंतु हैदराबाद शहरात केवळ प्रदूषणामुळे आकाशातील तारे  स्पष्ट दिसत नाहीत. हा वातावरणातील प्रदूषणाचा फार मोठा परिणाम अनुभवास आला. इथे  रात्री आकाश  स्वच्छ दिसत नाही.  आकाशातील ताऱ्यामध्ये लपलेल्या काही राशी व नक्षत्रे अगदी बारकाईने समजावून सांगितले; म्हणजेच दाखवून दिले.  ते जे पाहण्यासाठी एवढी मज्जा आली की  आता असे वाटते की पिक्चर पाहण्यासाठी जायच्या वाटणीचे असेच एखाद्या ठिकाण पाहण्यास जावे. जीवनात आनंदाइतकेच ज्ञान देखील महत्त्वाचे असते. याचा प्रत्यय आला.  तो शो संपला त्यानंतर परत होस्टेलवर मुक्कामासाठी गेलो. बॅग ठेवून हात पाय धुवून घेतले. परत येऊन सर्वांसोबत काही गप्पा मारल्या.  दिवसभर पाहिलेल्या ठिकाणांची चर्चा केली आणि जेवण करून झोपी गेलो. 

हैदराबाद मधील दुसरा दिवस.  सकाळी आम्ही उठलो.  फ्रेश झालो. नाष्टा केला.  पुढचे ठिकाण पाहण्यासाठी गेलो ते म्हणजे रामोजी फिल्म सिटी. 

(5) रामोजी फिल्म सिटी

 आमच्या विझिटचे मुख्य आकर्षण म्हणजे रामोजी फिल्मसिटी. रामोजी फिल्म सिटी हे ठिकाण देखील पाहण्यासाठी खूपच सुंदर आहे.  सुरुवातीला पर्यटकांचे स्वागत वेलकम सॉंग ने करतात. तेथे एक स्वतंत्र राज्याचे रूपांतर केल्यासारखेच आहे. म्हणजेच तेथे सर्वकाही कृत्रिम वास्तूंची निर्मिती आहे.  जसे की विमानतळ, रेल्वेस्टेशन, बस स्थानक, एअरपोर्ट, बंदर,  विविधप्रकारची  घरे आहेत तेथे.  वेगवेगळ्या देशातील विविध इमारतींच्या प्रतिकृती देखील तयार  केलेल्या  आहेत.  जसे की लंडन, अमेरिका, बांगलादेश, रशिया, कंबोडिया, नेपाल, इत्यादी देशातील अनेकप्रकारच्या इमारती तसेच सेंट्रल जेल, येरवडा कारागृह , स्टेच्यु ऑफ लिबर्टी, इंडिया गेट, गेट वे ऑफ इंडिया, हावडा ब्रिज, काय काय म्हणून सांगू? जगातील महत्वाची ठिकाणे, शहरे आणि तेथील इमारतींच्या  प्रतिकृती तेथे पाहायला मिळतात. ते पाहून अनेक देश आणि राज्यांची सफर केल्यासारखे वाटते.  तेथील इमारती पाहून असे वाटते की, ती घरे खरी आहेत.  रामोजी फिल्मसिटी मध्ये खूप फिल्म तयार केलेले आहेत. अनेक  सिनेमांची शूटिंग तेथे झालेली आहे. बाहुबली, चेन्नई एक्सप्रेस, सिंघम आणि नुकताच प्रदर्शित झालेला छावा  इत्यादी सिनेमांची शूटिंग रामोजी फिल्मसिटीमध्येच झालेले आहे.  आम्ही ते सिंघम पिक्चर मधील चांदणी चौक पाहिलं.  तेथे फिल्म कशी बनवतात तेही त्या डायरेक्टरने प्रत्यक्षात आम्हाला फिल्म बनवून दाखवली. पिक्चर शूट कशी केली जाते?  पिक्चर मध्ये आवाज कशी बनवतात?  पिक्चर ला बॅकग्राऊंड म्युझिक कसे देतात ?  ते आवाज कसे तयार करतात ? हेही तेथे दाखवले.  काही ठिकाणी डान्स शो व इतर शो देखील पाहिला.  रामोजी फिल्मसिटी मधील वातावरण खूपच आनंददायी आणि  मनोरंजक आहे.  रामोजी फिल्म सिटी पाहण्यासाठी  आम्ही पूर्ण दिवस घालवला.  सर्व काही पाहिलं  व्यक्त व्हायला देखील आठवत नाही इतकं सारं   रामोजी फिल्मसिटीमध्ये तयार केलेले आहे.  रात्री होस्टेलवर माघारी आलो.  फ्रेश झालो.  थोडा वेळ रेस्ट घेतली. त्यानंतर रात्रीचे जेवण केले आणि दिवसभराच्या गमतीजमतीवर गप्पा मारल्या आणि झोपी गेलो. 

 तिसरा दिवस उजाडला. दि.20 मार्च 2025.  सर्वजण उठलो फ्रेश झालो.  नाष्टा केला.  पुढच्या ठिकाणासाठी निघालो,  ते ठिकाण म्हणजे चारमिनार. 

(6) चारमिनार:- 

 चारमिनार हा कुतूबशहाने आपल्या बेगमसाठी बांधला होता. चारमिनार हा खूप उंच आहे. त्याला चारही दिशांनी पाहिलं की ते चारी बाजू सारख्याच दिसतात. चारमिनारच्या जवळ खूप मोठी आणि सुंदर बाजारपेठ आहे.  तेथे चुडीदार कपडे,  मोत्यांच्या वस्तू  जसे की बांगड्या, हार, ज्वेलरी  खूप प्रसिद्ध आहेत.  तेथेच एक कुतुबदर्गाह  देखील आहे.  कुतुबशहा व त्यांच्या काही खास लोकांची तेथे कबर देखील आहे. ते सर्व काही पाहिलं व पुढच्या ठिकाणासाठी निघालो ते ठिकाण म्हणजे सालारजंग म्युझियम.

(7) सालारजंग म्युझियम:-

सालारजंग म्युझियम हे हैदराबादमध्ये  झालेल्या राजा महाराजांचे काही प्रतिमा, फोटो आणि वस्तू मांडलेल्या होत्या.   त्यानंतर काही वेगळा देवदेवतांच्या मूर्ती देखील तेथे मांडलेल्या होत्या.  हत्तींच्या दातापासून बनवलेल्या विविध वस्तू देखील तयार केलेल्या होत्या.  पूर्वीच्या काळातील म्हणजे राजे महाराजांच्या काळातील खुर्च्या, पलंग, शाल, चादर व साड्या इत्यादी वस्तू प्रदर्शन म्हणून मांडलेल्या होत्या.  त्यावर केलेली नक्षीकाम बघितले. काही राजांच्या बाबतीतील माहितीचे फलक देखील तेथे लावले होते. त्यांच्या काही लढण्याची शस्त्रे जसे की लढण्याची शस्त्रे तलवार, बंदूक ,यांचे विविध प्रकार तेथे पाहिले.  त्याच म्युझियममध्ये जर्मनीतील घड्याळ देखील प्रदर्शनीय वस्तू म्हणून मांडले होते.  त्याची बेल देखील आम्हाला ऐकायला मिळाली. पुढचे ठिकाण होते स्नो वर्ल्ड.

(8) स्नो वर्ल्ड

 स्नो वर्ल्ड म्हटल्या नंतर ,अगोदर मला वाटत होते की तेथेच एक हिम प्रदेश असेल आणि आपल्याला तेथे नेणार असतील.  परत कळलं की आपल्याला हिम प्रदेशात नाही हिम प्रदेशासारखे रूपांतर केलेल्या एका मोठ्या टॅंक मध्ये आम्हाला अनुभव देणार आहेत. आमचा प्रवेश झाला एक फार मोठं टॅन्क होता .  त्यामध्ये खाली सर्व बाजूंनी बर्फ पसरला होता.  म्हणजेच बर्फाळ प्रदेशासारखे रूपांतर केले होते.  आम्ही आत मध्ये गेल्यावर आम्हाला सूट, बूट, कोट वगैरे घालण्यास दिले.  आम्ही ते घातले.  त्यांचा दरवाजा उघडला.  आत मध्ये बर्फावर स्लाईड करण्यास सांगितले.  आत मध्ये मेरीगो राऊंड होता व डिस्को पण होता आम्ही स्लाईड केले.  परत तेथे फुटबॉलच्या ग्राउंड देखील होता.  तेच आम्ही बर्फावर स्लाईड देखील केले.  फुटबॉल खेळलो.  डिस्को मध्ये डान्स केला.  एकमेकांना बर्फ मारून खेळलो.  फोटो काढले. खूप वेळ मज्जा केली व वेळ संपल्यानंतर बाहेर आलो.  त्यांचा सूट त्यांना माघारी दिला. त्यानंतर बस जवळ येऊन चहा घेतला आणि हुसेन सागर पाण्यासाठी पुढे निघालो. पुढचा स्पॉट होता आमचा हुसेन सागर.

(9) हुसेन सागर:- 

 हुसेन सागर हे एक मोठा तलाव आहे.  त्यामध्ये एक मोठी बुद्धांची प्रतिमा आहे.  भारताची निशाण म्हणजेच तिरंगा देखील तिथे आहे.  तेथे होडी चालवण्याच्या  खूप मोठ्या   स्पर्धा होतात.  समोरच एक शिवलिंग आहे.  काचेची एक वास्तू होती त्यामध्ये आमची बस दिसत होती. मला ते दृश्य खूप आवडले. मला व्हिडिओ करण्याचा मोह आवरला नाही. मी व्हिडिओ देखील केला व तेथील सर्व काही पाहिलं. नंतर आम्हाला शॉपिंग साठी आणखी एकदा बिर्ला मंदिराजवळ नेण्यात आलं.  तेथे आम्ही आम्हाला आमच्या पद्धतीने शॉपिंग केले.  खरेदी केल्यानंतर शॉपिंग नंतर रात्रीचे जेवण केले व हॉस्टेलवर येऊन झोपलो. सकाळी  आम्ही लवकर उठून आवरलं. नाश्ता केला. सर्व बॅगा घेऊन बसमध्ये बसलो ;  आणि परतीच्या प्रवासाला निघालो. माघारी   यायला लागलो तेव्हा तेथून मन निघायला तयार होईना.  येताना  खूप उंच उंच घरं आणि बिल्डिंग पाहिल्या. थोड्या वेळानंतर आम्हाला बस मध्ये झोप लागली .  नांदेडमध्ये आल्यानंतर आम्हाला जाग आली. नांदेड उमरगा या मार्गे आम्ही आलो.  उमरगा मध्ये जेवण केले. सोलापूर नळदुर्ग मार्गे सांगलीला आलो.  नळदुर्ग किल्ला दुरून बाहेरूनच पाहिला कारण तिथून किल्ल्यापर्यंत जायला आणि परत यायला वेळ लागेल असं सरांनी सांगितले.  त्यानंतर मंगळवेढा मार्गे सांगलीला आलो.  माघारी येताना सर्वांनाच दुःख झालेलं होतं कारण जे पाच दिवसांमध्ये आमची घट्ट मैत्री झालेली होती.  जेवढी मजा केली होती.  त्यांचा आता विरह होणार होता.  प्रत्येकाला वाईट वाटत होते.  जसजसे वाटेत विद्यार्थी उतरले की खूप वाईट वाटायचे. आपल्या आयुष्यात काहीतरी गवसलं होतं ते आपण हरवत चाललोय  की काय असं वाटत होतं. काहीजणांच्या डोळ्यांत पाणी घरंगळत होतं; तर  काहीजण हुंदके देऊन रडत होते.  आम्ही शिरढोण ता- कवठेमहांकाळ  येथे उतरलो. आमचे वर्गशिक्षक सोनार सर आम्हाला नेण्यासाठी आले होते.  गाडीतील सर्वांना आम्ही बाय बाय केला.  सरांनी आम्हाला चहा पाजला.  तिथून आम्ही जत मध्ये आलो.  रात्री सव्वा आठ वाजता काराजनगीत आमच्या मूळगावी  पोहोचलो. डोळ्यांत स्वप्न घेऊन मी घरी आले होते. घरी मम्मीला किती आनंदाने सांगावंसं वाटलं. आमची  ' एक्सपोजर विजिट - आऊट ऑफ स्टेट' एक अविस्मरणीय सहल जिल्हा परिषद सांगली ने घडवून आणली.  त्याबद्दल खूप खूप धन्यवाद. अशा ह्या प्रामाणिक , होतकरू आणि हुशार विद्यार्थ्यांसाठी जिल्हा परिषद एक्सपोजर विजिट आऊट ऑफ स्टेट अशा सहली घडवून आणते.  या सहली आमच्यासारख्या गरीब विद्यार्थ्यांना जीवनात पुढे अनुभवास मिळतील का नाही हे सांगता येत नाही;  पण नक्कीच या सहलीमधील जे काही मी पाहिलं,  अनुभवलं,  गणित , विज्ञान भूगोल ,भाषा , समाजशास्त्र या अनेक विविध अंगाने जे पाहिलं ते मी नक्कीच मनात साठवून ठेवीन आणि शासनाने जो माझ्यावर खर्च केला,  शाळेने माझ्यावर विश्वास ठेवला, आणि माझी निवड केली, त्यासाठी माझे शिक्षक आणि शाळेला कधीही विसरू शकणार नाही. ही विझिट मी माझ्या भविष्यात माझ्या भविष्यातील कर्तृत्वाने  परतफेड करून दाखवीन. ही एकच आशा परमेश्वर मला देईल, अल्लाहच्या कृपेने माझे उच्च शिक्षण पूर्ण व्हावे आणि माझ्या मनातील स्वप्ने पूर्ण करण्यासाठी ही शाळा अत्यंत उपयुक्त ठरावी अशी अपेक्षा ठेवते.

 

    -कु.अफसाना अकबर नदाफ. ( इ. 8वी.)

जिल्हा परिषद प्राथमिक मराठी शाळा, काराजनगी.

 ता.- जत, जि.- सांगली.

सहलीतील काही क्षणचित्रे